Arrasateko Olandixo eremuan egindako berrurbanizazioak espazioaren antolaketa eraldatu du, erabilera erosoagoa eta seguruagoa izan dadin. Proiektuaren helburu nagusietako bat oinezkoei lehentasuna ematea izan da, ibilgailuen presentzia eta abiadura mugatuz eta mugikortasun seguruagoa sustatuz.
Horretarako, bidearen antolaketa berria diseinatu da, lehen zeuden bi espaloi estuen ordez zabalera handiagoko espaloi bakarra sortuz. Galtzadaren zabalera ere murriztu egin da, eta zoladura eta material ezberdinen erabilerarekin zeharkako erritmoak eta ibilgailuen abiadura murrizten laguntzen duten elementuak txertatu dira. Horrela, ibilgailuen eta oinezkoen arteko harremana berrantolatu eta azken horien mugikortasuna lehenetsi da.
Sarbide eta aparkaleku gehiago
Berrurbanizazioak eraikinetarako sarbideetan ere eragin du. Lekua irabazi eta sarrerei protagonismo handiagoa eman diete, sarrera eta irteerak erosoagoak, seguruagoak eta atseginagoak izan daitezen.
Bestalde, aparkaleku-plazen kopurua handitu dute, ingurunean ahalik eta hobekien txertatuta, paisaian izan dezaketen ikusmen-inpaktua gutxitzeko irizpidearekin. Horrez gain, egoteko, atseden hartzeko eta begiratzeko gune berriak sortu dituzte, "pertsonentzako topagune eta gozamenerako espazio gisa".
Azaldu dute ikuspegi teknikotik, proiektuak zoladuraren berrikuntza osoa barne hartu duela, baita zerbitzu-sareen eguneraketa osoa ere, haien eraginkortasuna eta iraunkortasuna bermatuz.