Segurtasun Sailak kaleratutako oharrean zehazten da Arrasateko gertakaria ostalaritza-establezimendu batean izan zela, domeka goizaldean, 02:45 aldera. "Zerbitzuz kanpo zegoen ertzain bat bi emakumeren arteko borrokan bitartekari lanak egiten saiatu da, eta, ertzain gisa identifikatu ondoren, pertsona talde batek eraso egin dio. Zauritutako agentea osasun-zentro batean artatu dute, gorputzean jasotako kolpeen ondorioz".
Arrasatekoaren aurretik eta ostean, beste Ertzain batzuk zauritu dituzte, Eibarren eta Gasteizen, hamalau pertsona atxilotuz. Segurtasun Sailak "irmoki" gaitzestu ditu eraso horiek. Ricardo Ituarte Segurtasuneko sailburuordeak adierazi duenez “onartezina da edozein pertsonaren aurkako edozein eraso edo indarkeria-ekintza. Eta, bereziki, gizarte gisa zuzentzen gaituzten segurtasuna eta bizikidetza-arauak bermatzeko lan egiten dutenen aurka”.