Uztaileko lehen astetik, eraikin berriaren eta gaur egungo ospitalizazio-eraikinaren arteko loturan ari dira lanean, Debagoieneko ESIk adierazi duenez. "Obren fase hori beheko solairuan eta laugarren solairuan hasi da eta, ondoren, bigarren eta hirugarren solairuetan egingo dituzte esku-hartzeak, azkenik lehen solairuko konexioari ekiteko".
Fase berri horretan, obrek "aldaketa handiak" ekarri dituztela azaldu dute, eta, batez ere, ospitalerako sarbidean eta laugarren solairuko hallean eragiten digute. "Bizpahiru hilabetez gutxi gorabehera, erabiltzaile, senide eta laguntzaileentzako sarbide bakarra Txaeta kaleko Larrialdi Zerbitzuko atetik egingo da. Tarte horretan, Onarpen Orokorreko mostradorean ematen zen arreta Larrialdietako mostradorean eta beheko solairuan bertan dagoen Onarpeneko bulego berrian emango da", nabarmendu dute.
Barkamena eskatu dute
Beheko solairuan bi eraikinak lotzeko lanak amaitu ondoren, ospitaleko sarbide nagusia irekiko dute berriro, eta "etorkizunean izango duen diseinua ikusi ahal izango dugu", diote. "Barkamena eskatzen dugu sortutako eragozpenengatik; ospitale hobea lortzeko beste urrats bat gisa ulertzea nahi genuke", gaineratu du Debagoieneko ESIk.