Latinoamerikako hainbat herrialdetako gastronomiaz, kulturaz eta artisautza-lanez gozatzeko aukera izan du gaur egun osoan zehar Arrasateko Herriko plazara gerturatu denak. “Uztailaren 20a Kolonbiako Independentziaren Eguna da, herrialdea Espainiaren uztarritik askatu zela ospatzeko eguna. Eta Arrasaten kolonbiarren eta orokorrean latinoamerikarren komunitate handia dugunez, ospakizuna herrira ekarri gura izan dugu”, azaldu du Amerika Elkarteko Daniela Castrok eta gaineratu: "Kontinente oso baten independentzia ere gogoan hartu gura dugu eta nahi duguna da askotariko kulturekin askotariko ekintzak egitea".
Hala, eguerdi aldera gastronomia eta artisautza azoka egin dute, baina bertan ez dira Kolonbiako produktuak bakarrik eskaini, Latinoamerikako beste hainbat herrialdetakoak ere bai: fritanga bezala ezagutzen diren Nikaraguako piper-opilak, gaztadun tajadak eta repocheta-k; Peruko haragi txikituko enpanadak arrautza gogorrekin eta tipula karamelizatuarekin eta esne-gozokizko oinarri duten arto-irineko galletak; Kolonbiako Barranquilla hiriko askotariko arepak…
Azokan parte hartu duten artisauen artean euskaldunik ere egon da; besteak beste, xaboiak eta lurrinak egiten dituen Lur Ortiz eskoriatzarra, adibidez. "Ez nuen Amerika Elkartea ezagutzen, baina orain dela gutxi abisatu zidaten azoka egingo zutela eta ideia ona iruditu zitzaidan, kulturen artean adiskidetasuna egotea interesgarria iruditzen zaidalako", esan du Ortizek.
Arratsalde eta iluntze partean, aldiz, dantzek eta Nueva Generacion taldearen salsa, merenge eta kunbia doinuek girotu dute Arrasate.
Aldarrikapena ere bai
Festatik bakarrik ez, aldarrikapenetik ere izan du gaurko egunak. "Migratzaileen ezohiko erregularizazio prozesua bukatu berri dugu; bertan parte hartu duten eta horren beharra zuren pertsonentzat nahiko estresagarria izan dena. Eta gaurkoa hori erakusteko tokia izatea ere nahi genuen: hemen gaudela esateko modua, herri honen parte garela eta ekarpen ekonomikoaz gain kulturala ere egin gura dugula. Kulturaren gaia apur bat albo batera uzten da baina funtsezkoa da gizarte osasuntsu eta anitza izateko da", adierazi du Daniela Castrok.