Garaia Parke Teknologikoak eta Bailara Industrial Networkek lankidetza-hitzarmena sinatu dute. "Aliantza horri esker, Garaia Investorsek bere eragina handituko du, eta Debagoieneko ekintzailetza-ekosistemaren eta industria-sarearen arteko lotura sendotuko da", azaldu dute bi aldeek. "Programaren bidez, hasierako faseetan dauden startup-ek haien proiektuak aurkezten dizkiete balizko inbertitzaileei eta enpresa zein teknologia arloko profesionalei. Horrez gain, mentoring saioetan, tailerretan eta networking guneetan parte hartzeko aukera ere izango dute".
Akordioarekin, Bailara Industrial Networkek Garaia Investors bere enpresa bazkideen artean ezagutarazten lagunduko du, eta programako ekimenetan parte hartzea sustatuko du. Horrekin batera, Garaia Investorseko startup irabazlea Bailara Industrial Networkeko enpresa bazkide izango da urtebetez. "Horrela, Debagoieneko enpresa txikiek, enpresa ertainek eta enpresa traktoreek osatutako sarean integratzeko aukera izango du".