Obra hau, ohar bidez adierazi dutenez, hezkuntza komunitatearekin batera egindako diagnosi parte-hartzailearen emaitza da, eta hiru eremu nagusitan banatutako gune berria eskaintzen die ikasleei.
Batetik, mugimendu eremua dago, Mariren basoa izendatu dutena; intentsitate handiko gune horretan altzairu herdoilgaitzezko txirrista, kautxuzko tontorrak, soka bidez igotzeko aldapa, akazia egurrezko oreka-jolasak, tranpolina eta rokodromoa instalatu dira. Bigarren gunea eremu sinbolikoa eta artistikoa da, edo Galtzagorrien basoa eta Sorginen akelarrea; sormena lantzeko tipi bat, piñu-azalezko krater bat, lurreko margoekin markatutako antzoki txiki bat eta baratze eremu bat prestatu dituzte gune horretarako.
Eta, hirugarrenik, bioaniztasunaren eta atsedenaren eremua ere egokitu dute; natura umeei hurbiltzeko asmoz, intsektuen hotela, txorientzako habiak eta landaketa eremu anitzak sortu dituzte.
59 zuhaixka ere landatu dituzte
Patio inklusiboa egiteaz gain, proiektuak espazioa "humanizatzea" lortu duela adierazi dute Udaletik. Izan ere hainbat landaketa egin dira: "Haritzak, arteak, gereziondoak eta 59 zuhaixka unitate landatu dira itzala eta biodibertsitatea bermatzeko. Gainera, berrerabilpenaren aldeko apustua egin da, eraiste-lanetako hondakinak erabili baitira patioko tontorrak eta erliebeak sortzeko".
Aurrekontua: 104.148 euro
Patio inklusiboa sortu dute umeen garapen askea, sormena eta parekidetasuna bermatzeko, eta eskola barruko hezkuntza proiektuaren luzapen gisa onartu behar dira lanok. K1 Ekopaisaia enpresak gauzatu ditu lanak, 104.148 euroko aurrekontuarekin (BEZ barne); lanak apirilaren 8an hasi zituzten eta asteon eman dituzte bukatutzat.