Joan den astean Harmailatik saioan egindako elkarrizketan Andoni Calbanok eta Eneko Carrascalek aitortu zuten sentsazio onekin zebiltzala, eta uztailaren 24ko Espainiako Txapelketara begira lan ona egiteko esperantza zutela. Bada, esandako horiek asteburuan berretsi ditu Eneko Carrascalek, Iruñean jokatutako federazioen Espainiako txapelketan onena izan da eta salto hirukoitzean. Eta gainera, marka pertsonala zortzi zentimetrotan ondu du (16,28).
Euskadiko selekzioak ondo hasi zuen txapelketa, laugarren egon zen tarte batean, baina arratsaldeak aurrera egin ahala, eta jakinda Euskadiko taldeak atleta garrantzitsuei dagokienez baja asko zituela, postuak galtzen joan zen, zazpigarren geratzeraino.
Esan moduan, baina, albiste pozgarriena Carrascalek eman zuen. Eta azken saiakeran eman zuen onena, gainera. 15,33koa eginda, eta balio gabeko beste jauzi batekin, azken asteotako mailatik urrun zebilen. Baina, azken saiakeran hegan egin zuen, 16,28koa eginez.
200 metroko lasterketari dagokionez, Andoni Calbanok 20.71ko marka egin zuen eta bigarren sailkatu zen Oriol Sanchezen atzetik.