Goizean zaparrada handia egin badu ere, normaltasunez eraman dute aurrera ohiko bertako produktuen azoka. Behin azoka martxan zegoela, 11:00etan eliza azpiko arkupean xaboiak egiteko tailerra eskaini du Idurre Arangurenek, Ekoudalatxeko kideak, azokan bertan beraien produktuak eskuratzeko aukera ere egon da.
Bederatzi emakume izan dira guztira, xaboia egiteko tailerrean izena eman zutenak eta goiz pasa atsegina izan dute; etxea eta arropa garbitzeko xaboia nola egiten ikasiz. Pausoz pauso xaboia egiten eta azalpena ematen aritu da Aranguren, eta bertaratu direnen zalantzak argitzeko momentuak ere hartu ditu.
Segurtasun neurrietan arreta berezia jarri du, xaboiaren osagai nagusietakoa den soda kaustikoaren erabilera ona egiteko: nola berotu, zein materialekin ezin daitekeen elkartu, neurriak zehaztu... Xaboiaren erabilera egokia egiteko aholkuak ere eman ditu. Behin xaboiaren nahastea eginda, gerturatu direnen artean banatu eta etxea eramateko aukera izan dute.