Ekitaldia arratsaldeko seietan hasiko da, Kulturaten, eta, Beatriz Egizabalek gidatuta, arrasatear batzuek prestatu duten irakurraldi berezi bat egingo dute. Irakurraldiaren ostean, mokadutxo bat jateko aukera izango da. Tarte horretan, liburutegiko argazki zaharrekin osatutako proiekzio bat jarriko dute klaustroan, eta Del Valek musika emanaldi akustiko batekin amaituko du jaia.
Jaia, ikasturtea amaitzeko
Asun Agirianok, Arrasateko Udal Bibliotekako zuzendariak, azaldu duenez, gaurko ospakizun jaiarekin batera amaituko da ikasturtea. Hori horrela, ikasturte honetako balorazioa "oso ona" dela esan du: "Ikasturte ona izan da. Zerbait azpimarratzekotan, punta-puntako idazleak eta marrazkilariak etorri dira euren lanak aurkeztera, eta idazketa tailerrek ere partaidetza handia izan dute". Dagoeneko udazkeneko egitaraua prestatzen ari direla gaineratu du.