Udaletik azaldu dutenez, sistemaren erabilera "oso erraza" da, dendarientzat zein bezeroentzat. Erosleak dendariari enkargua egin ostean, dendariak, armairuan utziko du paketea, bezeroaren datuak sartuta (telefonoa edo helbide elektronikoa). Ondoren, paketea armairuan dagoen unean, bezeroak QR kode bat jasoko du whatsApp edo posta elektroniko bidez. Kode hori armairuko irakurgailuan eskaneatuta, bere kutxatila zabalduko da. Bezeroak gehienez 72 ordu izango ditu bere enkargua jasotzeko.
36 kutxatila, hiru tamainatan
Armairu adimendunak guztira 36 kutxatila ditu, hiru neurri desberdinetakoak: 12 kutxatila S neurrikoak (22 zentimetro); beste 12 M neurrikoak (33 zentimetro); eta beste 12 L neurrikoak (44 zentimetro). Zerbitzua herriko merkatari txikiek eta azokako saltzaile zein ekoizleek soilik erabili ahal izango dute.
Erabilera progresiboki hedatzeko asmoa dute
Atzo egin zuten sistemaren aurkezpena eta erabilera progresiboki zabaltzen joateko asmoa dute: "Dendari eta ekoizleak sistema berrian txertatzen joango dira, frogak eginez, eta sortzen diren zalantzak argituz. Horregatik, aurrerantzean, merkatarien eskura jarriko dira bezeroei zerbitzuaren berri emateko informazio-txartelak. Udalak aurreikusten du progresiboki erabilera zabaltzen joatea". Bide batez, Udalak, herriko merkatari eta ekoizleak zerbitzu berri honetan parte hartzera animatu ditu: "Dagoeneko merkatari eta ekoizle batzuk animatu dira eta froga fasean daude, baina gure asmo eta nahia da negozio gehiagorengana zabaltzea, denda txiki eta komertzioak bizirik izan daitezen". Interesa daukaten merkatari eta azokako ekoizleek merkataritza@arrasate.eus helbidean egin dezakete eskaera.
Ordutegi mugarik gabe jardutearen garrantzia
Tokiko ekonomia eta enplegu zinegotzi Jaime Bengoak ekimenaren garrantzia azpimarratu du: "Zerbitzu honen bitartez herriko komertzio txikia eta gure ekoizleak babestu eta indartu nahi ditugu. Gure helburua da saltokien irekiera ordutegiak herriko dendetan erosteko muga izan ez daitezen; horrela, bezeroek euren enkarguak nahi duten momentuan jaso ahal izango dituzte, herriko merkataritzaren salmentak handitzen lagunduz".