Arrasateko EAJk ohar bidez aurkeztu du Muzibar-San Frantzisko proiektua: "Zarugalde ingurua eraldatzeko eta herriko mugikortasuna hobetzeko proposamena, etorkizuneko ikuspegi integral batekin". EAJko eledun Ander Garayk dio Arrasatek datozen 20 urteetarako pentsatutako eraldaketa behar duela: "Soluzio integral, irisgarri eta konektatuak behar dira. Muzibar-San Frantzisko arrasatearren bizitza hobetzeko proposamen serioa, planifikatua eta prestatua da".
Mugikortasun "jasangarriago, irisgarriago eta ordenatuago" bat
Diotenez, mugikortasun "jasangarriago, irisgarriago eta ordenatuago baten" aldeko apustua egiten duen plana da, baina baita bizilagunen bizi kalitatea mantentzearen aldekoa ere, etorkizunerako hobeto prestatutako hiri espazio, aparkaleku eta konexioak bermatuz: "Jarduera inprobisatuen eta plangintza gabekoen aurrean, talde jeltzaleak urteetan landutako eredu bat defendatzen du, fase eta irtenbide desberdinekin elkarrekin konektatuta, datozen hamarkadetan Arrasateren benetako beharrei erantzuteko pentsatua. Proposamenak EAJk herrian mugikortasunaren eta hiri-berroneratzearen arloan aurretik defendatu duen ildoari jarraitzen dio, herritarren eguneroko bizitzarekin bateragarriak diren irtenbide integral eta jasangarrien alde eginez", adierazi dute.
Muzibar-San Frantzisko proiektuko "jarduera estrategikoak"
Jeltzaleen proiektuak, diotenez, "hainbat jarduera estrategiko" batzen ditu:
- Zarugalde erabat oinezkoentzat bihurtzea: "Oinezkoentzako espazio atseginagoa eta seguruagoa sortuz, herriko beste puntu batzuekin konektatutako bi norabideko bidegorri batez lagunduta".
- Espaloiak handitzea Otalora kalean, aparkalekuak mantenduz eta mugikortasunaren eta eguneroko jardueraren arteko bizikidetza hobetuz.
- Arbolapeta eta San Frantzisko arteko lotura hobetzea, "oinezkoen eta bizikleten irisgarritasuna lehenetsiz".
- Lur azpiko aparkaleku berria Kondekuan –Monterron aurreko berdegunean– "aparkaleku faltari behin betiko irtenbide estrukturala" eskainiz.
- Monterron parkearen birdiseinua: "Sarbidea modernizatuz eta kultura, gizarte eta aisialdiko jardueretarako erabilera indartuz".
Garay: "Arrasatek etorkizunean pentsatzen duten proiektuak merezi ditu"
EAJren ustez, hiri-berroneratzea ezin da jarduera isolatuetan soilik oinarritu: "Jasangarritasuna, irisgarritasuna, mugikortasuna eta herritarrentzako zerbitzuak uztartzen dituen estrategia koherente batean oinarritu behar da", dio Garayk. Eta honako hau gaineratu du: "Arrasatek biharkoan pentsatzen duten proiektuak merezi ditu, eta bat-bateko esku-hartzeak. Gure helburua da udalerri erosoagoa, irisgarriagoa eta etorkizunerako prestatuagoa eraikitzea, baina plangintzarekin eta bizilagunen benetako beharrei entzunda".
Zarugalde kalekoa, "ikuspegi orokor faltaren" adibide
Talde jeltzaleak Zarugalde kaleko azken esku-hartzea salatu du: "EH Bilduk Zarugalden bultzatu berri dituen jarduerek agerian uzten dute, hain zuzen ere, ikuspegi orokorraren falta. Hiri-eraldaketa integralik gabe planteatutako oinezkoentzako erabilera, inora ez doan bidegorri bat sortzea edo 30 aparkaleku-plaza baino gehiago aldez aurreko alternatibarik gabe kentzea, gure iritziz, adabakietan oinarritutako kudeaketa baten adibideak dira, eta ez egiturazko irtenbideetan oinarritutakoak". Zentzu horretan, EAJk deitoratu du 40.000 euro inguru bideratu izana Zarugaldeko margoketara: "Arazoak konpontzen ez dituzten eta mugikortasuna benetan hobetzen ez duten neurriak dira".
Horren harira, plangintza beharra aldarrikatu du Garayk: "Sinesten dugu mugikortasun jasangarrian, baina ondo egin behar da; plangintzarekin, alternatibekin eta pertsonek herriko egunerokoa nola bizi duten pentsatuta. Kontua ez da soilik kaleak ixtea edo lurrean lerroak margotzea; hobeto konektatutako Arrasate bat eraikitzea da, irisgarria eta funtzionala".