Joan den martxoan abiatu ziren lorategia berreskuratzeko lanak, eta behin lanak amaituta, gaur, domeka, Arrasateko Udalak egitarau "berezia" antolatu du Etxezarreta parkean egin duten lana aurkezteko. Zenbait ekintza egin dituzte goizean zehar parte hartu nahi izan dutenen gozamenerako, eta goizeko hamarretan eman diote hasiera egitarauari. Eguraldia lagun izanda, ibilaldia egin dute Arruenatik abiatuta Etxezarreta parkera arte.
Bisita gidatua
Behin parkera heldu direnean, Pello Garai Arrasateko Udaleko Landa Inguruneko teknikariak eta Iñaki Garmendia botanikariak bisita gidatua egin dute. Parkearen historia eta Udalak egindako esku hartzeak azaldu ditu Garaik, eta natura-gune berrian jarri dituzten landareen inguruan hitz egin du Garmendiak.
Horrez gain, Txatxilipurdi elkarteak umeen jolasetarako gunea zabaldu du, eta bisita gidatua eta umeen jolasak amaitu ondoren, 12:00etan, Arrasate Musikaleko Konboak kontzertua eman du parke erdialdean.
Parke bat, hamaika erabilera posible
Iñaki Telleriak, Txatxilipurdi elkarteko antolatzaileak, parkean egin ahal izango diren jarduera posibleen inguruan hausnartu du: "Eremu honek hamaika erabilera mota izango ditu. Izan daiteke ikastetxeetatik hona etortzeko hiruhileko amaierako txangoetan, Txatxilipurdin egiten ditugun ekimenetarako erabili ahal izango dugun espazio oso aproposa da, eta nik uste dut aisialdian arrasatearrentzako ere espazio on bat izan daitekeela, babesleku klimatiko bat egun beroenetarako".
