Nola kokatzen gara aita bihurtzen garenean? Zein da gure lekua? Nola bizi dugu egoera berri hau? Amatasuna eta aitatasuna berdin bizitzen al dira? Zer dagokio nori? galdera horiek mahai gaineratu eta esperientziak partekatzeko eta entzuteko tartea hartuko dute ekainaren 11an Magala espazio pedagogikoan. Unai Serrano eta Saray Cano izango dira hizlariak.
Aitei, amei, bikoteei edota aurrerago aita edo ama izan nahi duten pertsona guztiei zuzendutako saio irekia izango da, adierazi dute "interesa duen edonor" izango dela ongietorria.
Parte hartu nahi dutenek galdetegia bete beharko dute.
Pasatutako saiotik "zapore gozoa"
Joan den astean Magala espazioan lehen sorospenen inguruko saioa eskaini zuen Dorleta Sologaistoa profesionalak. Arizmendi Ikastolak dio hitzordu hura "oso baliagarria eta arrakastatsua" izan zela gurasoentzat zein Haur Hezkuntzako profesionalentzat. Datorren ekainaren 11a ere "elkarrekin ikasteko aukera bikaina" izatea espero dute.