Hiru alderen arteko hitzarmena sinatu dute Arrasateko Udalak, Gizabidea Fundazioak eta Garaia Parke Teknologikoak (S. Coop.); hitzarmen "garrantzitsua" Udalaren esanetan. Horren helburua da Iturripe eremuan herritarrei zerbitzu emango dieten "kirol-azpiegitura egokiak proiektatzea eta garatzea", gaur egungo "instalazioak berrituta eta hobetuta". Hala adierazi dute prentsa-ohar bidez: "Proiektu hau ezinbestekoa da herritarrei nahitaezko gutxieneko zerbitzuak bermatzeko eta udalerriko kirol-eskaintza modernizatzeko. Horrez gain, ibai ertza birnaturalizatuko da, ibaia berroneratuz".
Sinatutako hitzarmenarekin Gizabidea Fundazioarena den Iturripeko partzela eta Arrasateko Udalarena den Garaia Parke Teknologikoan kokatutako ESLD1 finka trukatuko dituzte. Horretarako, Garaia Parke Teknologikoak uko egingo dio eraikin horren gainean duen egungo administrazio-emakidari, eta, horren ordez, azalera-eskubide bat sortuko da bere alde, haren jarduera bermatuz.
Arrasateko Udalak eskerrak eman gura izan dizkie Gizabideari zein Garaia Parke Teknologikoari "adostasunerako prestutasunagatik eta lankidetzarako asmoagatik".
Jarraipen batzordea
Behin hitzarmena sinatuta, aldeek jarraipen batzorde bat osatuko dute hitzarmenean jasotako konpromisoak eta izapideak –jabetza aldaketak, erregistroko inskripzioak…– behar bezala betetzen direla ziurtatzeko. Hitzarmenak urtebeteko indarraldia izango du konpromiso guztiak gauzatu arte.