Parte-hartzea "eraginkorra eta gardena" izango dela bermatzeko, EAJk hiru fasetan parte hartzeko prozesu bat proposatu du:
1. Proposamenak egiteko fasea: herritarrek San Frantzisko eliza bisitatu ahal izango dute euren proposamenak aurkeztu aurretik, espazioa sakon ezagutzeko. Ondoren, bi asteko epea irekiko da edonork eraikinaren erabilerari buruzko ideiak aurkez ditzan.
2. Proiektuak aztertzeko fasea: proposamenak ausaz hautatutako bost pertsonak eta udal teknikariek osatutako mahai batek ebaluatuko ditu, aldez aurretik onartutako irizpideei jarraituz –bideragarritasun ekonomikoa, egingarritasuna eta herriarekiko irekitasuna, besteak beste–. Irizpide horiek betetzen dituzten proposamenak bakarrik igaroko dira hurrengo fasera.
3. Bozketa fasea: hautatutako proposamenak Arrasaten erroldatutako 14 urtetik gorako biztanleen artean bozkatuko dira. Babes handiena lortzen duen erabilera ezarriko da.
Posible balitz, uda aurretik
EAJk Arrasateko Udal Gobernuari eskatu nahi dio parte hartze prozesu hori abian jar dezala, ahal dela uda aurretik: "Arrasatearrek eurena den espazio baten helmugari buruz erabaki ahal izan dezaten. Hori funtsezko urratsa da proiektu publikoek herritarren beharrak eta nahiak islatzen dituztela bermatzeko", esan du Arrasateko jeltzaleen eledun Ander Garayk.