Hirugarren urtez antolatu du Ibai-Artek Ardo Eguna, baina oraingoan antolatzaileek Kulturolako arkupera jo behar izan dute, aurreko bi urtetan herriko plazan batu badira ere oraingoan eguraldiak ez duelako horretarako baimenik eman. Lekua, baina, aproposa da halako ekitaldietarako, eta Maider Larrañaga tokiko sommelierrak eta Toni Perez ardo apartsuetan adituak gidatuta, bertaratutakoek apardun ardoez gozatu ahal izan dute [Bi txakoli, Getariakoa eta Bizkaikoa. Bakion (Bizkaia) egindako Donieneko Apardune Brut Nature eta Aiatik (Gipuzkoa) datorren K5-eko Kilima Ancestral], eta bestetik, Gramona etxetik ekarritako hainbat proposamen: Imperial Brut 2019-a, Gramona Innoble Brut Nature Reserva Perpetua 20-a eta Gramona III Lustros 2017 Brut Naturea.
"Erantzun polita izaten du egun honek, jendeak interesa erakusten du eta nahiz eta orokorrean jendeak geroago eta ardo gutxiago edaten duen, kalitatearen aldeko apustua egiten dute eta hori eskertzekoa da. Gainera, ardoa oso produktu interesgarria da. Gaur egun garagardoa da ardoaren lehiakide handiena, horregatik ardoaren kontsumoa ere sustatzeko halako ekitaldiak garrantzitsuak dira", adierazi dio GOIENAri Maider Larrañaga sommelierrak.