Iazko Buruz Burukoan egon ez izanaren arantza kolpe batean atera du Ander Murua pilotari arrasatearrak, atzo txapelketako finalerako txartelarekin itzuli zen eta Irunen jokatutako kanporaketatik. Hala, datorren zapatuan, hilak 23, atzoko kanporaketa gainditzeko Rekalderen aurrean dezente sufritu zuen Unai Amiano izango du aurrean, Labriten.
Hasieratik aurrea hartuta
Atzoko partidako lehenengo minutuak parekatuak izan ziren, baina arrasatearrak hasieratik hartu zuen markagailuan aurrea (7-1). Alberdi partiduan sartzen joan zen, baina Arrasatekoak ez zion markagailuan nahi beste gerturatzen uzten (12-8) eta aldagelara joateko tarte bat hartu eta gero partidua ez zen askorik aldatu. Ez zirudien Alberdi partiduari buelta emateko kapaz zenik, Murua maila politean zebilen, tantoak ondo amaitzen, eta Alberdi ez zebilen berak nahiko lukeen maila erakusten. Hala, azken tantoetan, dena galdutzat zeukanean, markagailua txukuntzeko moduan egon zen, hil ala bizi jokatutako zenbait tantoetan asmatu egin zuelako, eta hor egin zion min apur bat Muruari, baina halaxe jokatuta oso zaila zen ordura arte segurtasun handia erakutsi zuen Murua mendean hartzea (22-12). Hala, arrasatearrak, txapel bat irabazi berritan, bigarren finala jokatuko du zapatuan, Labriten.