Leku berrian ere egungo ordutegia izango du BAZek: astelehenetik egubakoitzera 07:30etik 15:00etara –eguenetan, 18:30ak arte– eta zapatuetan 09:00etatik 13:00etara.
Arrasateko Udalak Biztanleen Arretarako Zerbitzuaren (BAZ) instalazioak osorik berritzeko proiektua 2025ean abiarazi zuen proiektuaren idazketarekin, izan ere, zerbitzua martxan jarri zenetik 20 urte igaro dira, eta instalazioak eta teknologiak eguneratzeko beharra zegoen. Arrasateko BAZ zerbitzua Gipuzkoako lehenetarikoa izan zen, Irungoaren eta Hondarribikoaren ostean.
Maiatzaren 20tik aurrera, Iturriotz kalean
Gaur egungo bulegoetatik behin behineko BAZera lekualdatzea maiatzaren 18tik 20ra egingo da. Ondorioz, eragina izango du funtzionamenduan, eta BAZ zerbitzu minimoekin izango da egun horietan.
"Hiru egun horietan material informatikoa lekualdatzen izango gara, eta baliteke momentu batzuetan etenaldi txikiak egotea zerbitzuan. Pazientzia eskatu nahi diegu herritarrei lekualdatzeak sortuko dituen eragozpenengatik. Asteazkenetik aurrera lokal berri honetan izango gara zerbitzua ematen", azaldu du 2006a ezkero BAZeko arduradun den Edurne Muxikak.
BAZ berrirako obrak maiatza bukaeran hasiko dituzte
Maiatzeko azken astean aurreikusten du Udalak abiatuko dituztela BAZ berritzeko obrak. Lau hilabeteko iraupena izatea aurreikusten dute, eta Bizkaiko Zamakoa SA enpresak burutuko ditu; lanen aurrekontua 486.140 eurokoa da, BEZa barne.
Eraberritze lanon bidez, bulegoaren irisgarritasun osoa bermatuko da egungo lur-kotak berdinduz, eta espazioaren banaketa optimizatuko da herritarren intimitatea eta langileen ergonomia hobetzeko. Horrez gain, arreta-gaitasuna sendotuko da 8 teknikariei euren lekua eskainiz, auto-tramiteetarako gune iraunkorra (OTT) gaituko da eta eraikinaren energia-eraginkortasuna nahiz isolamendu termikoa indartuko dira, herritarrei zerbitzu "modernoagoa, erosoagoa eta identifikagarriagoa" eskaintzeko asmoz.
Zerbitzu "pertsonalizatua, diskretua eta gertukoa" helburu
BAZ berriak arreta emateko eredu berri bat ere ekarriko du, "pertsonalizatuagoa, diskretuagoa eta gertukoagoa". Alegia, helburua da bertaratzen herritarrari zerbitzu integrala ematea, beharrezko tramite guztiak leku bakarrean egin ditzan: "Zerbitzu integralak aurrerapen handia ekarriko du Udalarekiko tramiteetan, izan ere, sistema berriarekin herritarra tramite osoa eginda aterako da BAZetik, buelta gehiago eman gabe", esan du Kepa Urteaga zinegotziak.
Eta honako hau ere gaineratu du Urteagak: "Gaur egun ezagutzen ditugun zutikako mostradoreak desagertuko dira eta BAZ berrian mahaietan artatuko dira herritarrak. Gainera, pantaila bikoitza izango dute mahai horiek, bata teknikariak kudeatuko dutena, eta, bestea, herritarrak dokumentazioaren tramitea jarraitzeko. Azken helburua baita BAZ berria zerbitzu integrala bilakatzea, herritarrei berme eta erraztasun guztiak eskaintzeko".