60 pilotari ditu egun Arrasate Pilota Taldeak; gehienak gaztetxoak, benjamin eta alebin mailakoak; 40 pilotari inguru. Horiek guztietatik neska bakarra ari da –iaz bi zebiltzan–, eta, junior eta senior mailan, ostera, ez dute pilotaririk.
Pilotari nagusien beharra
Taldeko arduradunetako bat den Iker Zugasti "pozik" agertu da taldeak zuzendaritza "oso egonkorra duelako", eta guztia "bide onetik" doalako. Hala ere, senior mailara pilotaririk heltzen ez dela eta, non hobetu badagoela aitortu du: "Kadete mailatik aurrera, pilotari gehienek jolasteari uzten diote, beste kontu batzueri garrantzia gehiago emanda; hor falta zaigu jendea". Egun hauetan jokatzen ari den Herriarteko txapelketan, Arrasateko talderik aurkeztu ez izanaren arrazoia da hori, hain zuzen.
Ander Murua, gaztetxoen eredu
Bide horretan, gaztetxoak esku pilotara urte gehiagoz lotzeko, Ander Muruaren papera nabarmendu nahi izan du Zugastik: "Telebistan ikusten duten pilotari bat, gero hemen entrenatzaile bezala izatea sekulakoa da. Gaztetxoak ilusio askorekin etortzen dira eta nabaritu da gaztetxoenen artean, benjamin eta alebin mailan izan dugulako gorakada".
Ander Muruaren profesional mailako debutarekin batera, Uarkaperen itxura aldaketa eta Arrasaten jokatzen diren pilota jaialdien gorakada ere etorri da. "Udalak asko lagundu du horretan, urtero lau edo bost jaialdi ekartzen dituzte Arrasatera, eta Anderrek jokatzen du gehienetan. Gainera, sekulako frontoia daukagu; bailarako onena da, eta horrek ere asko laguntzen du, bai partiduak antolatzerako, eta baita entrenatzerako orduan".