Zientzia Politikoetan doktoratu berri den Ainhoa (Aiora Enparantza) izeneko neska gazte baten doktoretza-tesiaren defentsa abiapuntu hartuta, desobedientzia zibila eta 18/98 sumarioaren auzia lantzen ditu Tanttaka Teatro konpainiaren antzezlanak. "Orain dela bost urte Egunkaria-ren itxieraren gaia landu genuen antzezlanaren bide beretik dator. 18/98 sumarioan lehenengo aldiz erabili zen desobedientzia zibila metodo politiko moduan, Estatuaren aurka egiteko. Hori guztia nire adineko askok dugu gogoan, baina, gazte askorendako gai arrotza denez, aproposa iruditu zitzaigun protagonista gazte bat izatea" azaldu du Mireia Gabilondo zuzendariak.
Ikus-entzunezkoekin lagunduta
Enparantzarekin batera beste lau aktore izango dira taularen gainean: Kepa Errasti aretxabaletarra, Iñigo Azpitarte, Klara Badiola eta Omar Somai; baina gehiago dira antzeztuko dituzten pertsonaiak. Antzerkiaren ohiko baliabideez gainera, historian zehar desobedientzia zibilaren ikur izan diren hainbat pertsonaren irudiak erakusten dituzten proiekzioekin lagunduta kontatuko dute erritmo azkarra duen istorioa.