Adufeiras de Salitre taldeko hiru kidek jarri dute gaur eguerdian giroa Kajoi tabernako terrazan, zarrabete, akordeoi eta panderoen doinura. Eguraldia ederra lagun, Xabier Diaz abeslari eta pandero-joleak hasieratik esan du dantzatzera animatu gura zuela publikoa. Txarroak eta jotak kantatzen hasi, eta pasodoblearen txanda iritsi denean arrimatu dira dantzara hainbat bikote. Abesti horretan, gainera, Hekhtor Folk igo da eszenatokira, kaikuarekin perkusioa jotzera. Minutu horiek ikus-entzuleen irria pizteko osagai guztiak izan dituzte. Eta dantzariek gozatu ederra hartu dute, bide batez.
Bidaia ondo aprobetxatu du hirukote musikariak, goizean trikiti eskolan izan baitira, ikasleekin elkartrukean. Xabier Diaz oso esker oneko azaldu da trikitixa eskolako Maixa Lizarribarrekin, "jaso dugun gonbidapena aparta izan delako".
