Jardunaldiaren helburua izan da enpresek eta pertsonek energia-fakturen ulermena hobetzea, baita kontsumoa eta kontratazioa optimizatzeko dauden aukerak ezagutaraztea ere, antolatzaileen esanetan. "Merkatu arautuaren eta merkatu librearen funtzionamendua azaldu da, eta gasaren zein elektrizitatearen kasuan merkatu eta banatzaile ezberdinen inguruko gomendioak eman".
Halaber, faktura elektrikoaren "azalpen zehatza" eman dute, haren irakurketa eta interpretazioa errazteko diseinatutako txantiloi baten bidez. "Saioak ikuspegi praktikoa ere izan du, bertaratutakoek euren fakturak berrikusi eta zalantza zehatzak planteatzeko aukera izan baitute".
Azkenik, egunerokoan energia-eraginkortasuna hobetzeko gomendioak helarazi dituzte, bai enpresa-esparruan bai etxe-mailan, "kontsumoaren kudeaketa eraginkorragoa sustatzeko helburuarekin".