Jeltzaleek helarazitako prentsa oharrean diote, besteak beste, Arrasateko etxe bakoitzeko 161,76 eurorekin, Gipuzkoako tasarik handienetako bat duela Arrasatek. Kontrara, diote, Beasainen adibidez, non edukiontzi adimendunen sistema bat erabiltzen den, etxeek 143,61 euro ordaintzen dute, %12 gutxiago. Aldea are handiagoa da dendetan eta ostalaritzan, EAJren arabera: Beasainen, saltokiek 346,23 eurotik gora ordaintzen dute, eta Arrasaten, berriz, 514,20 eurotik gora, %33 gehiago; eta ostalaritzan, aldea %14koa da, Beasainen 589,87 eurokoa eta Arrasaten 685,06 eurokoa. "Ez du zentzurik merkeagoak eta eraginkorragoak diren beste batzuk baino hobeto funtzionatzen ez duen sistema batengatik gehiago ordaintzen jarraitzeak. EAJk gobernatzen duen Beasainek dagoeneko erakutsi du beste sistema batekin berdin edo hobeto birzikla daitekeela. Bada garaia pausoa emateko eta edukiontzi adimendunak hartzeko Arrasaten eta Debagoiena osoan", esan du Garayk.
EAJk uste du unea dela EH Bilduk gobernatzen duen Debagoieneko Mankomunitateak Antzuolako eta Oñatiko hondakinen bilketa sistema birplanteatzeko, eta aurrera egiteko edukiontzi adimendunen sistema bateratu batera eskualde osoan, kostuak murrizteko eta eraginkortasuna hobetzeko.