Zarugaldeko bizilagunek bultzatutako eta eskatutako aldaketa izango da, kalean egiten ari direna. "Azken urteotan, Zarugalde kaleko bizilagunek behin eta berriz adierazi dute euren kezka ibilgailuen abiadura handiak sortzen dituen segurtasun arriskuengatik. Kalea oinezkoentzat seguruagoa izatea eskatu dute, bereziki adinekoen eta haurren mugikortasuna bermatzeko. Horrez gain, espazio atseginago eta lasaiago baten beharra azpimarratu dute, auzoko elkarbizitza sustatuko duena eta eguneroko bizitza kalitate hobean garatzeko aukera emango duena", adierazi du Arrasateko Udalak.
Horrela, Zarugalden oinezkoei lehentasuna emango zaie eta noranzko biko bidegorria sortuko dute. Ibilgailuei dagokionez garajeetako kotxeen sarbidea soilik baimenduko dute.
Gaur hasi dituzte Zarugaldeko lehen lanak eta kalean zeuden pibote guztiak kendu dituzte dagoeneko. Bihartik aurrera hasiko dira margotze lanekin. "Lan horiek egiteko euririk ez egitea ezinbestekoa da, eta, ondorioz, lanak eguraldiaren arabera gehiago edo gutxiago luzatu daitezkeela azaldu du Arrasateko Udalak.