Hilabete berezia da apirila liburu zaleentzako, eta, urtero bezala, Arrasateko Udal Bibliotekak hitzordu ugari eskainiko ditu literaturaren eta kulturaren garrantzia herritarrei helarazteko. Hori horrela, martxoaren 14tik 29ra zenbait ekimen egingo dituzte Kulturaten eta Santa Marinako auzo bibliotekan. Hurrengo asteari dagokionez, martitzenean ingelesezko literatura solasaldi saioak emango dio hasiera hilabeteko programari. Arratsaldeko seietan hasiko da Kulturateko Jokin Zaitegi gelan, eta, John Costellok gidatuta, Gail Tsukiyama idazle estatubatuarraren The Samurai's Garden liburua izango dute berbagai.
Eguaztenean, berriz, Komiki klubaren urteko hirugarren saioa egingo dute leku eta ordu berean. Amaia Mariezkurrenak gidatuko du saioa, eta Sandra Garayoa eta Bertol Arrietaren Hodeien gaineko aldean komikiaren inguruan hitz egingo dute.
Liburuaren Nazioarteko Eguna
Liburuaren egunaren bueltan, hiru hitzordu egingo dituzte hilaren 23tik 27ra bitartean. Apirilaren 23an hasita, Helena Azkarragaurizar ilustratzaileak Lehen Hezkuntzako haurrei zuzendutako Liburu bat maleta bat da sormen tailerra egingo du Santa Marinako auzo bibliotekan. Apirilaren 24ean, Arantxa Hirigoyen eta Philippe Albor bikoteak Ttinka antzerki eta kanta saioa egingo dute. Eta, azkenik, Idoia Torregarai kazetari usurbildarrak Mikroipuinak deituriko idazketa tailerra eskainiko du hilaren 27an.
Liburuaren egunaren bueltan egingo dituzten hitzorduez gain, hilaren 23an Alex Gurrutxagak Jon Gerediagaren Argia, lurra, zuhaitza, zerua eta Izena eta izana liburuen literatura solasaldia gidatuko du Kulturaten, eta hilabeteko egitarauari amaiera jarriko dio Claudia Piñeiroren Tuya eta El tiempo de las moscas liburuen inguruan egingo den gaztelaniazko literatura solasaldiak.