Horrez gain, "Kooperatibak erosketen kudeaketa integrala, jasangarritasuneko zerbitzu aurreratuak eta algoritmo propioetan oinarritutako tresna digitalak" konbinatzen dituela ere erantsi du Gipuzkoako Ganberak, eta, horrek, "erabakiak hartzea errazteko eta lehengaiak eskuratzeko prozesuak optimizatzeko" balio duela.
Ategik, gaur egun, 47 profesionalek osatutako plantilla du, Arrasateko egoitzan eta Txinan, Indian, Vietnamen eta Mexikon duen nazioarteko sarean banatuta. Ganberak, Ategik, herrialde hornitzaile nagusietan duen "presentzia global estrategikoa" goraipatu du: "Berrikuntza teknologikoaren alde egiten duen apustuak kudeaketa denborak murriztea eta prozesuak profesionalizatzea ahalbidetzen du, gaitasun aurreratuak enpresa txiki eta ertainen eskura jarriz". Azkenik, Ategik "bezeroen arteko lankidetza" sustatzen dituela ere esan dute.
Enpresen lehiakortasunari eustea helburu
Sai banaketa ekitaldian, Gipuzkoako enpresa-sare osoaren lehiakortasuna balioan jarri dute, garapen ekonomikoan, enpleguaren sorkuntzan eta lurraldeko enpresen nazioarteko proiekzioan duten "funtsezko eginkizuna" azpimarratzearekin batera. Ildo horretan Ganberako presidente den Mauricio Arregik, enpresek, inguruneak eta pertsonek "elkarrekin aurrera egitea" beharrezkoa dela adierazi du: "Gipuzkoa hazten ari da. Esportatu egiten du. Enplegua sortzen du. Eta oinarri industrial eta teknologiko sendoa mantentzen du. Eta horrek, oraingoa bezalako eszenatoki batean, are balio handiagoa du".
Ategi ez da ekitaldiko enpresa saritu bakarra izan. 2026ko Gipuzkoako Enpresa Saria Grupo Campezok eraman du. Lemu Groupek Enpresa Nazioartekotzearen Saria jaso du; Egaña Groupek, ETE Industrialaren Saria; eta Semi Zabalak Berrikuntza Enpresa Saria.