12:30etan abiatu da Seber Altube Plazatik Arrasateko Mugimendu Feministak deitutako manifestazioa. Beste hainbat herritan bezala, Beste mundu bat feminismotik. Zapalkuntza sistemen aurrean, antolakuntza eta borroka izan da mobilizazioaren buruan eroan duten pankartaren leloa eta jendetzak egin du bat ekimenarekin. Hala, Herriko Plaza txiki geratu da manifestazioari amaiera eman dion ekitaldirako.
Emakume Txokoko irrintzi taldeko kideen irrintziekin hasi dute azken ekitaldia, eta ostean, mugimendu feministako bi ordezkarik irakurri dute Emakumeen Nazioarteko Egunaren bueltako adierazpena. "Askotariko mugimenduetatik gabiltza eragiten, baina guk argi dugu ez dugula feminismorik eta antiarrazismorik gabeko mugimendurik nahi, ezta mundurik ere. Horrexegatik diogu "beste mundu bat feminismotik". Eta hori lortzeko antolakuntza eta borroka dira gure armarik indartsuenak. Emakume, trans eta bollerak kaleak hartzeko prest gaude!. Eraiki ditzagun aliantzak , nork bere lekutik. Elkarrekin nahiz subalternitate propioetatik. Eraiki ditzagun sare sendoak. Askotariko zapalkuntzen bitartez sostengatzen den sistema honi erantzun diezaiogun askotariko gorputz eta borroketatik", esan dute, besteak beste.
Leire Etxezarreta, Eider garro eta Maider Azakarraugarizar trikitilariek eta Emakume Txokoan Olatz Urkiaren kantu tailerreko hainbat emakumek abestu duten Isilduak kantuarekin amaitu dute ekitaldia.