Asteburu honetan jokatuko dira 2026ko Euskal Herriko Ezker Paretako Kluben arteko Txapelketako finalak, Arrasateko Uarkape pilotalekuan. Lehenengo partiduan, Gazte mailako Alde Zaharra (Donostia) eta LAPKE (Lazkao) elkarteetako bikoteek jokatuko dute aurrez aurre. Bigarrenean, ostera, Ohorezko mailako Lea Ibarra (Munitibar) elkarteko A eta B bikoteek neurtuko dituzte indarrak.
Euskadiko Euskal Pilota Federakuntzako arduradunentzat finalak jokatzeko datak zeresan berezia dauka: "Martxoaren 8aren bueltan izanda, emakumeen kirolaren ikusgarritasuna eta protagonismoa indartzeko apustua egiten dugu, gure inguruan tradizio eta sustrai handia duen modalitate batean".
Ezker Paretako Kluben arteko Txapelketari buruz, esan dute kluben arteko lehiaketa ofiziala bultzatzeko antolatzen dutela, kirol-sarea indartzeko eta pilotariei lehiaketa-ibilbide egonkor eta antolatua eskaintzeko: "Arrasateko finalak konpromiso horren barruan kokatzen dira; pilotazaleek aukera paregabea izango dute maila goreneko partidak bertatik bertara ikusteko; aldi berean, emakumezkoen pilotaren garapenean eta aitortzan aurrera egiten jarraituko dugu".