Hamargarren Arrasate-Udalatxek ez du inor hotz utzi, aurrealdeko postuengatik borroka oso polita egon delako. Udalatxeko tontorrean batu diren zaleak bai –asko izan dira–, banakaren bat hoztuko zen, ez duelako azken egunotako tenperatura egin, baina iragarpenak txarrak baziren ere eguraldiak errespetatu egin du, eta korrikalariek giro paregabea izan dute 22 kilometrotako lasterketa egiteko.
Ibai Larrea iazko txapela defendatzera etorri da, lehenengoz jantzi du 2026 honetan dortsala, eta sasoi oso onean dagoela erakutsi du lasterketa irabazita (1.51.58). Ez zuen lan makala, Gontzal Murgoitio, Lluis Puigvert –Joseba Iglesias saria irabazi du–, Alain Santamaria, Oier Zubeldia... kontrario zuzenen zerrenda luzea zen. Hain zuzen, antzuolarrak gaur arte inoiz ez dio Lluis Puigvert kataluniarrari irabazi, eta badirudi gaur "zatoz nire mendi inguruetara" esan diola Puigverti. Larreak oso lasterketa ona egin du, baina gain-gainean izan du kataluniarra, eta helmugan 13 segundo baino ez dizkio atera. "Esan diot Lluisi sekulako lasterketa egin duela, Udalatxetik behera inoiz jaitsi gabe egoteko oso azkar etorri da eta neurri handian ibilbidea ezagutzen nuelako irabazi dut, hor abantaila izan dut", adierazi du antzuolarrak. Hirugarren postuan, berriz, Oier Zubeldia helmugaratu da, podiuma osatuz.
Emakumezkoetan ere pare-parean indarrak
Oihana Zubillaga izan da lasterketara lehenengoz etorri eta besoak altxa dituen emakumezkoa (2.19.27). "Ezusteko handia izan da hemen irabaztea. Urteko lehenengo lasterketa izan dugu hau, eta oso pozik nago egindakoaz". Lasterketa buruan, baina, lasterkari bat baino gehiago izan da lasterketan zehar. Ainhoa Sanz iritsi da Meatzerrekara arte lehenengoa, baina Udalatxera igotzen Zubillagak aurreratu egin du, eta baita atzetik etorri eta denak atzean utzi dituen Carrodilla Cabestrek –Joseba Iglesias saria irabazi du– ere. Goitik beherakoan, baina, Zubillaga jarri da lasterketa buruan, eta helmugan 3 minutuko tartea atera dio lasterketako tarte batzuetan hunkitu egin den korrikalari kataluniarrari: "Ia negarrez hasi naiz pasarte baten baino gehiagotan, zer izan da hori! Tontorreko animoak, Arrasateko kaleetan batu den jendetza, pasada bat izan da", adierazi du Carrodilla Cabestrek amaieran. Eta, hirugarren Ainhoa Sanz helmugaratu da, hura ere pozik, nahiz eta Udalatxera igotzen hanka altxa behar izan duen.
Sailkapenak ikusteko egin klik hemen.
Oharra: Lasterketaren xehetasun guztiak Harmailatik saioan erakutsiko ditu Goienak astelehenean (20:00, 22:00) eta argazki galeria hau ere osatzen joango gara.
