Letonak gaineratu du Ordiziako talde "oso indartsua" dela: "Elkar ondo ezagutzen dugu, lau urte daramatzagu bata bestearen aurka jokatzen. Bloke oso indartsua da, ligako defentsarik onena; erasoan, talderik onena ez izan arren, defentsan egindako lan bikainari esker sailkapenaren goialdean daude. Bloke hori apurtzen saiatuko gara, bi puntuak etxean gera daitezen".
Azken bi lehiak irabazita iritsiko dira arrasatearrak: "Azken derbia irabazi genuen, Oñatin, eta horrek indar handia eman digu; ondo entrenatzen eta jokatzen ari gara. Ordiziaren aurka gu geu izatean egongo da gakoa; hasieratik bukaerara irabazteko helburuarekin kantxaratu, konfiantzarekin. Taldean jokatzen dugunean oso zaila da gu menderatzea. Gainera, etxean partida bakarra galdu dugu denboraldi osoan. Guretzat oso partida garrantzitsua da; bospasei talde gaude oso puntu gutxiren bueltan, eta garaipen edo porrot batek norabidea erabaki dezake; irabazi egin nahi dugu, etorkizuna gure esku egon dadin. Asko eskertuko dugu zaleen bultzada".