Pattal ibili dira David Peñaren neskak Ibaizabalen aurrean. Bizkaitarrak bigarren postuan daude, eta hori azken hiru jardunalditan punturik batu barik zeudela. Hala ere, partidua hasi eta berehala hartu dute aurrea, etxekoak defentsan makal eta bereziki erasoan ezinean ibili eta gero. Lehenengo hiru laurdenetan izan dira kanpotarrak hobeak (14-19, 12-19,6-16, 16-16) eta laugarren laurdenean hanka altxa dute azeleragailutik.
Arrasatekoak bereziki erasoan ibili dira txarto, jaurtiketetan gaizki, Galdakaoko defentsaren aurrean zirrikiturik aurkitu ezinka ibili dira. Uxue Etxarte (14) eta Naroa Garai (12) izan dira moreen alde puntu gehien batu dituztenak, taldeak guztira egindakoen erdia baino gehiago. Hala, bereziki hirugarren laurdenean erakutsi dituzte ezintasun handienak, sei puntu baino ez dituzte egin.
Sailkapenaren erdian, eta azken hiru partiduak galduta, sailkapenean kontrario zuzena den Avilesen kantxan jokatuko dute datorren astean.