Izan ere, irailetik urtarrilera arteko tartea denboraldia prestatzeko baliatu ohi dute Arrasate Dragoikoek, gimnasta bakoitzak dagokion koreografia berrira eta denboraldian zehar erabili duen tresna berrietara ohitzen joan dadin –uztaia, pilota, mazoa, soka edo zinta–.
"Lehena beti izaten da berezia"
Arrasate Dragoi gimnasia taldeko zuzendaritza taldean diharduen Edurne Elkororen arabera, "beti da berezia" denboraldiko lehen txapelketa: "Lehen zita beti izaten da berezia, gimnastek denboraldi honetarako landu dituzten koreografiak eta aparatu berriak izaten dituztelako. Zapatuan egindako lanaz harro gaude; martxa hartzen joateko, ez dago batere gaizki!".
Prozesua bera da helburua
Denboraldi honetarako helburuei dagokienez, oinarria gozamena izan behar dela argi du Elkorok: "Klubaren helburu nagusia da gimnastak tapizera irten eta disfruta dezatela. Behin hori eginda emaitzak lortuz gero, ondo baino hobeto!". Izan ere, prozesuan dute arreta jarrita: "Gimnasta bakoitzaren konfiantza eta autonomia sustatzea, ahalegina, diziplina, talde-lana eta halako balioak indartzea dira gure lehentasun nagusiak. Gure ustez, prozesua bera da ikaskuntzarik handiena, eta horrek epe luzera ekarriko ditu benetako lorpenak edota emaitzak".
Iturripe noiz berrituko zain
Gaur egun, Uarkape udal pilotalekuan eta Arrasate institutuko gimnasioan entrenatzen dira. "Urteak daramatzagu entrenatzeko leku eta instalakuntza hobeen beharrean. Institutuko gimnasioa ez da leku egokiena guretzat. Gimnasian erabiltzen diren aparatuak airera botatzen dira, eta horretarako eraikinak gutxieneko altuera bat behar du; bada, txiki geratzen zaigu", adierazi du Elkorok. Uarkape frontoian ez dago arazorik altuerarekin, baina Arrasate Dragoirentzat ez daude behar beste ordu gimnasta guztiak bertan entrenatu daitezen: "150 gimnastarekin ahal dugun moduan moldatzen gara. Aerobikeko taldeak, esaterako, zapatu goizetan entrenatu behar izaten du". Hori guztia aintzat hartuta, klubeko zuzendaritza taldeko kideak dio Iturripe kiroldegi berriko instalazioak "primeran" etorriko zaizkiela.
Euskadiko txapelketa apirilean
Bestalde, aurten Arrasaten egingo da aerobikeko Euskadiko Txapelketa, benjamin mailan; apirilaren 19an Iturripen izango da topaketa eta apirilaren 26an, 2025-2026ko denboraldiko aerobik taldeko infantil mailako bikote bat. berriz, Uarkapen.
Arrasate Dragoi: "Mutilak ere ongietorriak dira"
Arrasate Dragoi taldeak honako mezu hau azpimarratu du: "Mutilak ere ongietorriak dira klubean. Espainia mailan, adibidez, gimnasian eta aerobikean talde mistoa dago eta bakarka lehiatzeko aukera dute. Berdintasuna bultzatzen duen kirola da honako hau".