Gipuzkoako Emakume Profesional, Enpresari eta Zuzendarien Elkarteak –Aspegi– antolatutako sariak hamaikagarrenez banatuko dituzte. Lurraldeko "emakumeen talentuaren bozgorailua" da sariketa eta aurten, partaidetasunean eta eraldaketa sozialean jarri nahi izan dute arreta Aquí, cuentas. Hemen, bazara leloarekin.
Mugerza "figura estrategikoa"
Epaimahaiak erabaki du Zuzendari/Profesional kategorian Leire Mugerza Garate (Mutriku, 1976) saritzea. Mondragon Kongresuko presidentea da bera 2022tik eta Ekonomia Sozialeko erantzukizun eta autoritate mailarik goreneko kargua du gaur egun. Industria-ingeniari teknikoa da eta kooperatiba-zuzendaritzan masterduna. Aurretik, Eika kooperatiban eta Eroskin ibilitakoa da; azken honetan, Kontseilu Errektoreko presidentea da 2012tik. Mondragonen egiten duen lanaz gain, Mugerza CEPESeko presidenteordea da, Ekonomia eta Gizarte Kontseiluko (EGK) kidea eta Ekonomia Sozialeko Emakume Liderren taldeko kidea. "Hortaz, estatuko gobernantza sozioekonomiko eta laboralean figura estrategikoa da", adierazi dute Aspegitik.
Enpresaburu saria, Eider Sanchezek
Bestetik, Enpresaburu Saria Eider Sanchez Herrerok (Donostia, 1986) jasoko du. Naru Intelligence-ko kofundatzaile eta CEOa da bera. Osasun-sektoreko "aliatu teknologiko estrategiko" gisa kokatu da Naru, Adimen Artifizialean (AA) oinarritutako soluzio berritzaileetan espezializatuta, balio terapeutikoaren kate osoan laguntzeko. Konpainiak Aiatech teknologia aurreratua garatu du. Bestetik, Step Oncology soluzioak, onkologia arlorako berariaz diseinatua, konplikazioak aurreikusten dituen eta pazienteen bizi-kalitatea hobetzen duen sistema integrala eskaintzen du.
Sariak, otsailaren 19an
Sari-banaketa ekitaldia otsailaren 19an egingo dute, Donostiako Parke Teknologikoan. Ane Zuazubiskar kazetari eta bertsolariak gidatuko du, eta Gipuzkoako enpresa eta gizarte-arloko ordezkariak batuko dira, "emakumeen talentua ospatzeko" gune bihurtuz.