Honako gune hauetan egingo dira lanak:
● Garagartza–Atxabalpe oinezkoen bidea: bide osoaren asfaltatzea.
● Arteaga baserriko bidea: bide osoa asfaltatzea; lanek irauten duten bitartean ohiko sarbidea itxita egongo da eta bide alternatibo bat prestatuko da.
● Aragoa kalea: galtzada eta aparkalekuak asfaltatzea eta seinaleztapen horizontala margotzea.
● Bizkaia etorbidea: hainbat hondoratze konpontzea, zebrabide altxatuak asfaltoz egokitzea eta seinaleztapen horizontala berriztatzea.
● Obenerrekako aldapa: zebrabide altxatuak asfaltoz egokitzea eta seinaleztapen horizontala margotzea.
Eragina bihartik hasita
Lanek bi hilabeteko iraupena izatea aurreikusten da. Lehen fasean, Garagartza–Atxabalpeko oinezko bidean jardungo da. Bihar, otsailak 5, hasiko dira lanak prestatzen, eta bihartik aurrera ibilbidea itxita egongo da hurrengo zazpi lanegunetan.
Bi hilabetez, baldin eta eguraldiak laguntzen badu
Asfaltatzeko lanok eguraldiaren menpe daudela aurreratu dute Udaletik: "Epe hori eguraldi-baldintzen araberakoa izango da, eta horiek egokiak ez badira, lanen iraupena luzatu egin daiteke; izan ere, euriarekin lanak eten behar izaten dira".
Behin lehen faseko lanak amaituta hasiko dira Garagartza auzoko asfaltatzeak, edota Aragoa kalekoak: "Arrasateko Udalak herritarren ulermena eta lankidetza eskertzen ditu, lanek sor ditzaketen eragozpenengatik".
Bi milioi euro 2024tik 2034ra
Gaur bidalitako oharrean gogora ekarri dutenez, Arrasateko Udalak 2 milioi euro inbertituko ditu 10 urtetan herriko errepideak konpondu eta berritzen. Urtez urte 200.000 euroko inbertsioa egingo du Udalak, 2024an hasi eta 2034 urtera bitartean. "Herriguneko errepide eta espaloiak konpontzeaz gain, baserri auzoetako errepide eta oinezkoen bideak konpontzeko apustua ere egin dugu. Eta inbertsio hau modu jasangarri batean egingo dugu, urtez urte diru partida finko bat bideratuz. Horrela, lan horiek egiteko mailegu bat eskatu beharra saihesten da", adierazi du Obra, Zerbitzu eta Mantentze zinegotzi Kepa Urteagak.