Ostiral arratsaldeko pintxo-tragoak inauguratu zituen 2026ko jaiak. Gaueko mus txapelketara Arrasate eta Elorrioko 46 bikote arrimatu ziren, eta txapela Eber-Malá bikoteak eraman zuen. Hurrengo eguna izan da beteena, zapatua. Auzo-bazkaria eta gero, Lopene ganadutegiko poniekin entretenitu dira haurrak. Bien bitartean, argazki zaharren bideo-sorta proiektatu dute elkarte barruan, duela lau hamarkada baino gehiagotik hona ospatutako jaien errepasoa eginez. Txokolate beroa zerbitzatzeko tartea ere izan dute. Gauean, rock kontzertuan murgildu dira Laino Beltzak eta Inguma taldeekin.
Gaur, berriz, Lore Gazteak taldeko dantzariek girotu dute eguerdia, Udalaxpe txistulari taldeak jarritako erritmora. Bukaeran, luntxa jan dute elkartean, San Baleixo ermitan abestu duten Gesalibar eta Garagartzako koruko kideekin batera.