Saioaren helburua, Udalak azaldu duenez, Arrasateko espazio publikoa hobetzeko proposamenak kolektiboki lantzea da, azken hilabeteetan egindako ekintza parte-hartzaileen emaitzetatik abiatuta. "Udalak sustatzen duen hirigintza parte-hartzaileko prozesuak herria anitzagoa, zaintzaileagoa eta iraunkorragoa izatea du xede, genero-ikuspegia ardatz hartuta", azaldu du.
Azaroan abiatu zuten prozesuaren baitan, auzoz auzoko esplorazio-ibilbideak eta bestelako dinamika parte-hartzaileak egin dituzte, herritarren "eguneroko bizipenetatik eta beharrizanetatik ikasteko" asmoz. Urtarrileko saio irekia, hain zuzen, egindako lan horren itzulera eta aurrerapausoa izango dela adierazi du Udalak, jasotako ekarpenak proposamen zehatz bihurtzeko. "Parte-hartzea funtsezkoa da: ahots guztiak beharrezkoak dira, eta bereziki emakumeen eta disidentzien ekarpenek leku garrantzitsua izango dute saioan", nabarmendu du.