Galiziako taldea aurretik joan zen partidu osoan. Laurdenetako emaitzak adierazgarriak dira: 16-21, 30-38, 45-53 eta 64-72. Lehen bi partzialak galiziarren aldekoak izan ziren (16-21 eta 14-17) eta azken biak berdinketarekin amaitu baziren ere (15-15 eta 19-19) ez ziren nahikoa izan garaipena lortzeko.
Zuzendu beharreko akats asko egin zituztela adierazi zuen partidu amaieran Joane Legarreta jokalariak. "Saiatu gara baina akats asko izan ditugu jaurtiketetan eta defentsan, eta horrela zaila da partidu mota hau irabaztea. Talde oso ona da, baina bi jokalari falta zituzten eta pentsatzen genuen posible izango zela irabaztea. Ez dugu ondo jokatu; defentsan nahiko ahul ibili gara hasieran, intentsitatea falta izan zaigu eta nabaritu egin da amaierako markagailuan. Horrelako partiduetatik ikasi egin behar berriz ez gertatzeko", esan zuen.
Aurrera begiratuta hobera egiteko taldea dutela azaldu du Legarretak: "Espero dugu hobera egitea. Partida gehiago irabazteko taldea dugu, ideiak ere badaude. Gora jotzea gustatuko litzaiguke".
Hurrengo asteburuan ere Iturripen
David Peñak gidatzen duen taldeak ezin izan du ligako joaneko erronda garaipen batekin bukatu. Jardunaldiari amaiera emateko multzo bereko taldeen arteko bi partiduren faltan zazpigarren daude taulan, erdi erdian.
Hurrengo asteburuan ere Iturripen jokatuko dute; hain zuzen ere, taularen beheko postuetan dagoen Robles Lleidaren aurka.