Udal ordezkariek azaldu dutenez, lanak originala izan beharko du, teknika librea erabilita. "Parte-hartzaile bakoitzak, beraz, nahi eran egin ahal izango du kartela", nabarmendu dute. Badira, ostera, errespetatu beharreko oinarri batzuk. Esaterako, kartelak nahitaez bertikala izan behar du eta Aratusteen ezaugarri edo adierazle bat jasotzeaz gain, honako testu hau ere jaso beharko du: 2026 Inauteriak Arrasate.
Neurriari dagokionez, eskuz egindako kartelen neurriek 50 x 70 zentimetrokoak izan behar dute, eta euskarri informatikoan aurkezten dutenek gutxienez Din A3 tamainako paperean ere inprimatuta aurkeztu beharko dute. Egilearen nortasuna azaldu gabe eta atzealdean lema bat duela aurkeztu behar dira kartelak guztiak. Horrekin batera, gutun-azal itxi batean lema bera eta egilearen datuak adieraziko dira.
Irabazlea epaimahai bitartez aukeratuko dute eta 400 euroko saria jasoko du kartel irabazlearen egileak.