"Pena da, iaz neska mordoa izan genituen torneoan, eta aurten mutilak bakarrik etorri dira, baina inoiz ez dago jakiterik. Hain zuzen, gure harrobian neska mordoa ditugu eskubaloian jokatzen baina gaur ez dira animatu. Kontuak kontu, pozik geratu gara torneo polita antolatu ahal izan dugulako eta alde horretatik eskerrak eman nahi dizkiegu ikastetxeetan hitzorduaren berri eman duten irakasleei. Izan ere, gazte batzuk gure kategoria txikietako jokalariak dira, baina beste batzuk beste kirol jarduera batzuetan dihardute", adierazi du klubeko presidenta Ines Azpiazuk.
Helburua eskubaloian jokatuaz goiz eder bat pasatzea zen, eta helburua soberan bete dute. Iturripeko kantxa osoa hainbat zatitan banatuta, hitzordura batu diren 50 gazteek gozatu polita hartu dute, eta Azpiazuk aurreratu moduan, irabazleendako sari bereziak eman beharrean, jokalari guztiendako izan dituzte opariak.