Takk elkarteko kide den Malen Aranegik azaldu duenez, "Euskara sustatu, eta, batez ere, bi herrietako Euskararen egoera alderatzeko" antolatu dute topaketa, eta ildo horretan, egin dute egunarekin hasteko tertulia. "Bi herrietako egoera soziolinguistikoaren inguruan jardun dugu, eta, etorkizunera begira, euskara nola ikusten dugun", esan du Aranegik.
Meatzaldeko Xiker Alvarezek aitortu duenez, egoera "zaila" igarotzen ari da Bizkaiko eremu horretan: "Entzuten da euskara kalean, baina politikoki, zein gazteriaren partetik, oztopo ugari daude. Helduek ere ez dute askorik laguntzen". Horregatik, Arrasaten "gustura" sentitu direla ere esan du Alvarezek: "Arrasaten euskaraz lasai hitz egiteko leku bat aurkitu dugu, presio sozial eta politikorik gabe. Gainera, lagunak egiteko ere baliatu dugu eguna".
Tertuliaren ostean, triki-tourra egin diete arrasatearrek Meatzaldeko gazteei. Azkenik, Seber Altubeko karpan, bazkaria eta bingo musikatua eginez amaitu dute eguna. Gaurkoan Arrasaten elkartu dira eta Meatzaldean ere elkartzea da asmoa, baina oraindik ez dute data lotu.