Azaroaren amaieran aurkeztu zuten Arizmendi Ikastolako Lagunen Taldea eta argi utzi zuten ekimenaren helburua, gaur egungo Ikastolak posible izateko ahaleginak egin dituztenen lana balorean jarri eta ezagutzera ematea dela.
Hasiera batean,30 lagun inguruk osatutako taldea da, eta hiru azpitaldetan antolatuko da, Arizmendi Ikastolak presentzia duen herri bakoitzean talde bana osatuz. Antolatzaileen arabera, Ikastola Lagunen Taldeak ikastolen izaera, balioak eta funtzionamendua herritarren artean zabaltzea du xede, betiere konfrontaziorik gabe eta ikuspegi eraikitzaile batetik.
Aurkezpenean, taldearen sorrera arrazoien eta helburuen berri eman zuten, baita epe laburrean izango duten funtzionamenduaren inguruko azalpenak ere. Arrazoien artean: sozialak, identitarioak eta emozionalak azpimarratu zituzten. Horrez gain, Illart Azkarate, Arizmendi Ikastolako zuzendariak, ikastolak herri bakoitzean duen egoeraren inguruko azalpena eskaini zuen, eta saioa galdera-erantzunekin amaitu zen.
Ikastola Lagunen Taldeak, besteak beste, ikastolen izaera komunitarioa, irabazi asmorik gabeko eredua, kooperazioan eta autoeraketan oinarritutako funtzionamendua eta euskararen transmisioan duten zeregina azpimarratu nahi ditu. Era berean, aurreko belaunaldiek egindako lanari jarraipena ematea eta ikastolen etorkizuneko erronketan bidelagun izatea dute helburu. Bide luzea eta hobetzeko asko duten arren, sortu duten ereduaz "harro" daudela argi utzi dute.