Maria Blanco, Ander Malbadi, Asier Galarza, Esti Curiel eta Manex Astigarraga umoristek BostOK! umorezko bakarrizketa saioa egingo dute Seber Altube plazako karpan. Abenduaren 6an Durangoko Azokan antzeztu du boskoteak, eta Seber Altubeko karpan egingo dute haien hurrengo emanaldia. "Emanaldiaren ondoren ikusleak lehen baino lotsagabeago irten litezke. Eta umoretsuago ere bai. Izan ere, horixe da BostOK!, bost umoristak ondutako klima", azaldu du taldeak.
Gabonetako kanpainaren baitan 70 ekintza baino gehiago jasotzen dituen egitaraua prestatu dute herriko hainbat kultur eragilek. Bertan, Santamas Komisiñuak antolatu dituen lau ekintzetako bat da gaur 19:30ean egingo den bakarrizketa saioa.