Goizeko lehenengo partiduan gipuzkoarrek eta bizkaitarrek neurtuko dituzte indarrak, eta jarraian, etxekoek eguneko bigarren eta azken partidua jokatuko dute, nafarren kontra (12:50). Txapelketa talde-argazki handi batekin amaituko dute, eta hirugarren denbora etorriko da jarraian.
Senior mutilak, Mojategin
Astebeteko etenaldiaren ostean, taldeak lanera itzuliko dira asteburuan. Hala, senior mailako gizonezkoek zapatuan jokatuko dute, 16:30ean hasita, Baztanen kontra, Mojategin. Nafarrak kontrario zuzenak dira, bi puntuko aldea baino ez dago-eta bi talde horien artean. "Elizondokoak bolada ezin hobean helduko dira Mojategira: denboraldi hasierako aurreneko bi partiduak galdu eta gero, azken lau jardunaldietan berdinketa bat eta hiru garaipen eskuratu dituzte", adierazi dute klubeko ordezkariek. Emakumezkoen kasuan, hitzordua domeka goizean izango da, 11:00etan, Gipuzkoa Sortzenen kontra, Donostian.