Lehiaketan parte hartzeko, formularioko zazpi galdera erantzun beharko dira. Gero, zozketa egingo dute galdera guztiak ondo erantzuten dituztenen artean, eta saria izango da 60 euroko sei bonu Elkar Arrasaten erabiltzeko. "Bonuen erdiak adin txikikoentzat izango dira", zehaztu dute.
Adin guztietako herritarrek dute parte hartzeko aukera. "Kulturateko sarreran daude lehiaketako galderak erantzuteko kontsulta liburuak eta informazio osagarria", adierazi dute Udal Bibliotekako kideek. "Dagoeneko hasi gara web orritik erantzun mordoa jasotzen. Animatu zu ere!", gaineratu dute.
Gabonetako zuhaitz berezia
Bestalde, Udal Bibliotekara doazenek "zuhaitz eder eta berezi bat" ikusiko dute. "Jose Maria Lasagabaster Bentxes-en argazkiak azaltzen dira. 50eko hamarkadan egindakoak dira, herriko jaietako argazkiak, kuadrillen kalejirak, dantzaldiak... Merezi du hurbildu eta ikustea. Baten batek akaso bere burua edo ezagunen bat aurkituko du argazki multzoan", nabarmendu dute Udal Bibliotekako kideek.
