Emanaldia iraganera egindako bidaia gisa planteatu dute aurtengoan. Zortzi abesti interpretatu zituzten, bakoitzaren aurretik elkartearen historian mugarri izan diren une eta pertsonen ahotsak edo irudiekin tartekatuz. Pantaila handiaren bidez 2000. urtetik gaur arteko Zarzuelak gogora ekarri zituzten, urte hauetan guztietan Izaskun Murgiaren inguruan sortu den komunitatea eta lana nabarmenduz.
Urtero moduan, ikuskizun osoa Iker Olazabalek gidatutako Arrasateko musikaleko orkestraren doinuekin jantzi zen, emanaldiari kohesio eta indar handia emanez.
Ikus-entzuleek txalo beroak eskaini zizkieten abeslariei, musikariei, zuzendariei eta Zarzuela hau posible egin duten guztiei. Amaieran, “Amigos siempre amigos” abestia abestu zuten elkarrekin, eta publikoari ere bat egiteko gonbita luzatu zioten; saioari amaiera borobila emanez.
Eskerrak eta aitortza
Eskerrak luzatu zizkieten Tere González zuzendariari, urte luzez parte hartu duten kideei —tarteen artean jada gure artean ez daudenak ere gogoratuz— eta laguntza ekonomiko nahiz instituzionala eman duten guztiei: Arrasateko Udala, Anboto Inmobiliaria, Astore eta Laboral Kutxa, guztietako ordezkariak igo ziren agertokira. Tartean Maider Morras alkateak hitz batzuk eskaini zituen, Izaskun Murgiak Arrasaten egindako lan "handia" nabarmendu zuen, elkarte lirikoaren ekimena herriko kultur ondarearen parte dela gogora ekarriz.
Bereziki une hunkigarria izan zen, Zarzuelaren historian garrantzitsuak izan eta azken urteetan zendu direnen izenak pantaila handian ikustean: Jesús María Arce, J. Ramón Elorza, Iñaki Jauregi, Karmele Iparragirre, J. Ignacio Agirre “Txito”, J. María Ugarte, Inma Armenteros, Arantxa Tena, Jon Ander Gantxegi, Luis Usatorre eta M. Dolores Jauregi. Guztiak txalo artean gogoratu zituen aretoak.
Etorkizuna zalantzan
Zarzuelaren etorkizuna ez dago oraindik guztiz argi. Amaia Antzokian konponketa lanak egitea aurreikusia dago, eta horrek zalantza sortzen du datozen urtetako programazioaren eta ekitaldiaren jarraipenaren inguruan. Era berean, elkarteak berak adierazi du erreleboa behar-beharrezkoa dela: ilusioz eta giro onean lanean jarraitzen duten arren, gazteagoak proiektura erakartzeko beharra azpimarratu dute, ekimenak bizirik iraun dezan.
Zapatu eta domekarako sarrerak oraindik salgai daude ondorengo estekan: sarrerak.
