Patinete elektrikoak eta horien erabilera desegokia "benetako arazo" bilakatzen ari da bide segurtasuna bermatzerako orduan. Aste honetan, esaterako, Udaltzaingoak bi patinete elektriko konfiskatu ditu. "Biak legez kanpokoak ziren, legezkoa dena baino abiadura handiagoa hartzeko gaitasuna zutenak: legeak 25 kilometro orduko muga ezartzen du eta patinete horiek 87 eta 108 kilometro ordura arteko abiadura har zezaketen".
Udaltzaingoak azpimarratu du patinetez abiadura handian zirkulatzea arriskutsua dela, bai gidariarentzat bai gainerako herritarrentzat. "Gainera, salaketa administratiboak eta isunak ez ezik, delitu penal baten aurrean egon daiteke erabiltzailea, patinete horren berezko ezaugarriak legeak ezarritakoetatik kanpo badaude. Adibidez, 25 kilometro orduko abiadura gainditzen badu, legez kanpoko ibilgailu bilakatzen da eta ezin da herrian erabili", azaldu du Udaltzaingoak.
Kontzientziazio kanpaina abian
Urriaz geroztik, Udaltzaingoak kontzientziazio eta informazio ekintzak egiten ditu kalean, Trafiko Zuzendaritza Nagusiak (DGT) patinete elektrikoen erabiltzaileei ezarritako arauei buruzko azalpenak emanez. Hilabete batean, "esku-hartze ugari" egin dituzte, "herritarren segurtasuna bermatzeko eta erabilera arduratsua sustatzeko".
Kontzientziazio kanpainaren baitan, Udaltzaingoak gogorarazi du patinete elektrikoak ez direla jostailuak, eta ez direla gomendagarriak opari moduan gazteentzat, bereziki Gabonetarako. "Helburua da segurtasuna eta elkarbizitza bermatzea herriko kaleetan", azpimarratu du.
Ekarpenak, astelehenera arte
Zirkulazio ordenantza idazteko bidean, parte-hartze prozesu bat abian du Udalak, eta herritarrek astelehenera arte dute aukera ekarpenak egiteko, udal webgunean. "Urtea amaitu baino lehen ordenantza berria batzordean lantzea aurreikusten dugu, eta otsaileko osoko bilkuran onartzea espero dugu", azaldu dute udal ordezkariek. "Ordenantza horrek erabilera arauak zehaztuko ditu eta herritar guztientzako tresna izango da", gaineratu dute.