Arrasateko Udalak Musakolako kiroldegian ezarri zuen udan NIK bidezko sarbide digitala, kiroldegiko erabiltzaileei "sarbide azkarrago eta erosoagoa" emateko helburuarekin. Bide horretan, Uarkapen ere sistema bera erabilgarri dago jada.
Txartel digitala mugikorretik aktibatu daiteke. Horrela, plastikozko txartel fisikorik gabe erabili ahalko dira kiroldegiko sarbide automatikoak. Udalak azaldu du, Eusko Jaurlaritzak sustatutako identifikazio digitala "segurua" dela, eta, bestetik, txartel honek hainbat zerbitzu bateratzen dituela ere argitu dute; hala nola, identifikazioa, sarrerak eta erakunde publikoen jakinarazpenak jaso daitezke. "NIK txartel birtuala tresna estrategikoa da udal instalazioetan aurrerapauso teknologiko sendoak emateko. Digitalizazioa ez da etorkizuna, oraina da, eta horrelako sistemek erabiltzaileentzat esperientzia errazago eta intuitiboagoa eskaintzen du", adierazi du Mikel San Miguel kirol zinegotziak.
Txartel fisikoak diseinu berria
Udalak, txartel fisikoaren diseinu berria ere aurkeztu du. "Udaberrian aurkeztutako Herri Marka berria jarraitzen duen irudi eguneratu eta modernoa du aurrerantzean banatuko dugun txartelak", dio San Miguelek.
Azkenik, Mojategiko instalazioetan ere sarrera digitala ezartzea izango da Udalaren hurrengo pausua, sartu-irteerak "modu egoki eta ordenatuan" egiteko ezarriko dute. QR bidezko sarbidea ere jarriko dute "kirol instalazioen zaintza eta erabilera egokia bermatzeko". Egokitzapen lan hauek 2027rako eginda egotea espero du Udalak.
