Elkar ezagutzeko dinamikaren ostean, hainbat galdera planteatu dituzte: Non hartzen dira Arrasate hobetzeko erabakiak? Nortzuk hartzen dituzte? Zein adinetakoak dira pertsona horiek? Garrantzitsua al da haur eta nerabeen begirada erabaki-gune horietan egotea?.
Gero, Txikilandiako lantaldeko bi koordinatzailek bisita egin dute, 2026ko ediziorako ideiak eta proposamenak jasotzeko. "Bideo baten bidez Txikilandia zer den azalduta, haurrek euren ekarpenak plazaratu dituzte. Gainera, ikastetxeetan gelakideen iritziak jasotzeko lana ere eraman dute etxera", azaldu dute kontseiluko kideek.
Azkenik, Arrasate hobetzeko lehen proposamenak bildu dituzte, eta hurrengo saioan alkateari eta zinegotziei aurkeztuko dizkiete. Udalak nabarmendu du Haurren Kontseilua "parte-hartzearen eta hezkuntza demokratikoaren tresna baliotsua" dela, eta herriko haurrek "haien ikuspegitik Arrasate hobetzen laguntzeko duten konpromisoa" eskertu du. "Haurren ahotsa entzutea gure herria eraikitzeko funtsezkoa da. Haien begirada fresko eta konprometituak ekarpen handiak egin ditzake", azpimarratu dute udal ordezkariek.