Joseba Ezkurdiak ondo estutu du Jokin Altuna Eusko Label lau eta erdiko txapelketako hirugarren postuko norgehiagokan, baina, hala ere, amezketarrak izango du kaiolako kaxoira igotzeko ohorea. Hobeto kantxaratu da Altuna III.a, 11 eta 5 jarri da aurretik, baina Ezkurdiak, ondo erantzun du eta bi tantoko aldearekin bakarrik joan dira pilotariak atsedenaldira.
Atsedenaren ostean. Jokin Altunak sakea aprobetxatuz berriro ere ihes egin du markagailuan, 17 eta 12koa ezarriz. Markagailu horrek ordea, ez du askorik iraun, Ezkurdiak sei tanto egin ditu bata bestearen atzetik, eta aurretik jarri da. Azken txanpara parekatuta heldu dira biak, baina amezketarrak hobeto aprobetxatu ditu aukerak, eta, azkenean nagusitzea lortu du.
Aurretik jokatu duten binakako norgehiagoka ere parekatua eta gogorra izan da. Ander Murua arrasatearrak eta Zabaletak osatutako bikoteak, Alberdi II.a eta Albisu garaitu ditu. Muruak tanto politak egin ditu etxeko zaleen gozamenerako, eta sasoian dagoela erakutsi du.