Tenisa, padela eta squasha uztartzen dituen Arrasate Kirol Elkarteak urteroko zita izan du asteburuan: Euskadiko Squash ligako jardunaldia. Klubeko kide Iñaki Uribetxebarriak azaldu moduan, liga barruan jokatzen diren sei txapelketetako bat jasotzen dute urtero Musakolako kiroldegiko squash pistetan.
Aurten hogei jokalari federatuk eman dute izena, eta horien artean egon dira Ismael Abbas, Jon Diez eta Alain Gomez debagoiendarrak. Hala, hamabi neurketa jokatu dituzte ostiral eta zapatu artean. Lehenengo partiduak hiru setetara jokatu dituzte, eta azken kanporaketak bost setetara, joko bakoitza hamaika tantora izanik.
Sistema horretan ondoen moldatu dena Yoel Erasun izan da, Iruñeko Amaya kirol elkartekoa. Sestaoko Benedikta taldeko Mikel Yanguasi irabazi dio finala, bi seteko aldearekin (3-1).
Hirugarren eta laugarren postuen lehian aritu dira Unax Merino gasteiztarra eta Fran Serrano sestaoarra, eta arabarrak lortu du tanto gehiago egitea.
Kontsolazio kategorian, AKE Squash taldeko bi kidek neurtu dituzte indarrak finalean, eta, azkenerako, Jon Diez aritu da Ismael Abbas baino hobeto.